PDK kërkon vazhdimin e seancës konstituive më 14 gusht

Përparim Gruda thotë se kërkesa është bërë për respektimin e Kushtetutës dhe Rregullores së Kuvendit, ndërsa akuzon Vetëvendosjen për bllokim të konstituimit të legjislativit.

Partia Demokratike e Kosovës (PDK) ka dorëzuar kërkesë për vazhdimin e seancës konstituive të Kuvendit të Kosovës, duke propozuar që ajo të mbahet nesër, më 14 gusht, nga ora 11:00, përcjell albinfo.ch.

Deputeti i PDK-së, Përparim Gruda, ka thënë se kërkesa i është drejtuar kryesuesit të seancës, Avni Deharit, me qëllim të respektimit të dispozitave kushtetuese dhe Rregullores së Kuvendit.

“Kemi dorëzuar në emër të PDK-së kërkesën në drejtim të kryesuesit të seancës, Deharit, për mbajtjen e vazhdimit të seancës për nesër në orën 11:00, siç kërkon Rregullorja”, ka deklaruar Gruda.

Ai ka akuzuar Lëvizjen Vetëvendosje se po pengon konstituimin e Kuvendit dhe ka kërkuar nga kryetari i kësaj partie, Albin Kurti, që të lejojë vazhdimin e seancës.

“Funksionin e deputetit po na pamundëson me ushtru LVV-ja. Në emër të partisë i bëj thirrje deputetit Kurti ta lejojë Deharin ta thërrasë seancën. Deharit nuk i takon ta japë asnjë vlerësim politik, ka rol teknik për ta thirrur seancën dhe për ta realizuar atë”, ka thënë Gruda.

PDK-ja kishte paraqitur një kërkesë të ngjashme edhe dy ditë më parë për vazhdimin e seancës konstituive. Megjithatë, nga Lëvizja Vetëvendosje kanë deklaruar se seanca nuk do të thirret pa u arritur një marrëveshje ndërmjet partive politike.

Seanca konstituive, e cila nisi më 6 gusht, mbeti e papërfunduar. Në Kuvend ende nuk është përmbyllur procesi i zgjedhjes së kryetarit dhe nënkryetarëve.

Kryeministri në detyrë, Albin Kurti, gjatë seancës kishte kërkuar dy herë shtyrjen e saj, me arsyetimin se nevojitet kohë shtesë për një marrëveshje të mundshme lidhur me zgjedhjen e presidentit.

Situata e krijuar ka lënë të bllokuar përfundimin e procesit të konstituimit të Kuvendit, ndërsa partitë politike vazhdojnë përplasjet dhe negociatat për gjetjen e një zgjidhjeje./Albinfo.ch

---