PDK publikon listën e kandidatëve për deputetë për zgjedhjet e 7 qershorit

Bedri Hamza: Mbi 50% e listës janë prurje të reja, profesionistë të dëshmuar dhe kuadro të rinj

Partia Demokratike e Kosovës (PDK) ka publikuar listën e kandidatëve për deputetë me të cilën do të garojë në zgjedhjet e parakohshme parlamentare të 7 qershorit, përcjell albinfo.ch.

Kryetari i PDK-së, Bedri Hamza, ka bërë të ditur se lista përmban një përzierje të energjisë së re dhe përvojës politike, duke theksuar se mbi gjysma e kandidatëve janë emra të rinj.

“Kjo është lista jonë. Profesionistë të dëshmuar në punë, në angazhim publik dhe në shërbim ndaj qytetarëve. Në këtë listë ka energji të re, por edhe përvojë. Njerëz që besojnë se Kosova meriton më shumë dhe më mirë. Mbi 50% e listës së kandidatëve janë prurje të reja, si pjesë e përkushtimit të PDK-së për t’u dhënë hapësirë kuadrove të rinj”, ka shkruar Hamza në një postim në Facebook.

Ai shtoi se përveç listës së kandidatëve, PDK në ditët në vijim pritet të prezantojë edhe programin zgjedhor, të cilin e cilësoi si “më seriozin dhe më të përgjegjshmin” për shtetin dhe qytetarët.

“Përveç listës, në ditët në vijim PDK do ta prezantojë edhe programin më serioz dhe më të përgjegjshëm për shtetin dhe qytetarët. Më 7 qershor, ju do ta keni edhe një mundësi për të vendosur për të ardhmen e vendit, ndërsa thirrja ime është e përzemërt: Besoni në Kosovë!”, ka përfunduar Hamza.

Zgjedhjet e parakohshme parlamentare në Kosovë do të mbahen më 7 qershor./Albinfo.ch

---