Pllakati kundër Erdoganit rrezikon marrëdhëniet Zvicër-Turqi

Bëhet fjalë për një fotografi montazh në të cilën shihet Erdogan dhe pranë kokës së tij revolja bashkë me mbishkrimin: “Mbyteni Erdoganin me armët e tij”

Një pllakat pa shije i paraqitur në protestën kundër politikës së presidentit turk Erdogan që është mbajtur të shtunën në Bernë, pritet të shqyrtohet nëse përbën  thirrje publike për ushtrim krimi ose dhune apo jo, shkruan srf.ch. Ndaj përpiluesve të tij është iniciuar ndjekje penale.

Bëhet fjalë për një fotografi montazh në të cilën shihet Erdogan dhe pranë kokës së tij revolja bashkë me mbishkrimin: “Mbyteni Erdoganin me armët e tij”. Ky pllakat me përmbajtjen e tij, sipas drejtorit për çështje sigurie në Kantonin e  Bernës, Reto Nausse përmbush figurën e veprës penale të thirrjes publike për dhunë, transmeton albinfo.ch. Për këtë arsye ai tashmë ka paralajmëruar kallëzimin penal.

Nga ana tjetër, organizatorët e protestës janë distancuar nga përmbajtja e pllakatit.

Lidhur me këtë pllakat, është ftuar për bisedë në Ministrinë e jashtme të Turqisë ambasadori zviceran në Ankara, Walter Hafner. Para tij ishte ftuar zëvendësja e tij meqë ambasadori nuk ndodhej në Turqi, njofton Ministria e Punëve të Jashtme e Zvicrës (EDA).