Policia e Kosovës paralajmëron për mashtrime përmes SMS-ve

@unsplash

Policia e Kosovës ka ngritur alarmin për një fushatë mashtruese (phishing) që po qarkullon aktualisht përmes mesazheve SMS, të cilat paraqiten në mënyrë të rreme si njoftime nga Posta e Kosovës.

Sipas njoftimit zyrtar, këto mesazhe përmbajnë lidhje të rreme që synojnë të mashtrojnë qytetarët për të marrë të dhëna personale dhe informacione të kartelave bankare, me qëllim përfitimi financiar. Autoritetet sqarojnë se Posta e Kosovës nuk ka dërguar mesazhe të tilla dhe se linket e përfshira nuk i përkasin domeneve zyrtare.

Policia u bën thirrje qytetarëve që të tregojnë kujdes të shtuar dhe të mos bien pre e këtyre mashtrimeve digjitale. Konkretisht, rekomandohet që qytetarët të mos klikojnë në linqe të dyshimta, të mos ndajnë të dhëna personale apo bankare, të mos kryejnë pagesa përmes këtyre faqeve dhe të fshijnë menjëherë mesazhet mashtruese.

Në rast se ndonjë qytetar ka kryer pagesë ose ka dhënë informacione përmes këtyre linqeve, Policia e Kosovës këshillon që të kontaktohet menjëherë banka përkatëse për anulimin e transaksionit dhe rasti të raportohet në stacionin policor më të afërt.

Policia e Kosovës rithekson përkushtimin e saj në parandalimin dhe luftimin e mashtrimeve digjitale dhe fton qytetarët për bashkëpunim të vazhdueshëm dhe vigjilencë ndaj formave të reja të krimit online.