Policia tregon për kërcënimin me bombë në Prishtinë

Policia e Kosovë njofton se ka bllokuar rrugën “Luan Haradinaj”, në Prishtinë nga ora 10: 30 deri rreth orës 15:00 pas një telefonate kërcënuese që ka marrë roja i sigurimit në Këshillin Gjyqësor të Kosovës, dhe dyshimet për vendosjen e një mjeti të dyshimtë.

Policia sqaron se ka pasur tri  thirrje kërcënuese, transmeton albinfo.ch.

“Në këto thirrje telefonike është lajmëruar një person mashkull i cili ka kanosur me vendosje të mjetit shpërthyes në drejtim të institucioneve të drejtësisë, konkretisht Këshillit Gjyqësor të Kosovës dhe Prokurorisë Speciale të Republikës së Kosovës. Policia e Kosovës ka ndërmarrë të gjitha veprimet operative dhe hetimore”, thuhet në njoftim.

Policia thekson se pas kontrollit nuk kanë gjetur ndonjë mjeti të dyshuar.

“Sa i përket identifikimit të personit të dyshuar i cili ka kryer kanosjen me mjet shpërthyes, Policia e Kosovës është duke punuar intensivisht në identifikimin e personit dhe abonuesit të numrit të telefonit nga i cili është kryer kanosja”, theksohet në njoftim.