Presidenti serb paralelizon situatën në Iran me ndërhyrjen e NATO-s në Kosovë më 1999

Presidenti serb, Aleksandar Vuçiq, ka deklaruar se sulmi i Shteteve të Bashkuara të Amerikës dhe Izraelit ndaj Iranit do të ketë pasoja të gjera në skenën politike botërore dhe se në përputhje me këtë, Serbia duhet ta ruajë lirinë dhe pavarësinë e saj, por njëkohësisht t’i forcojë kapacitetet mbrojtëse.

Ai tha se beteja kryesore do të zhvillohet për ndryshimin e Qeverisë në Iran” duke e paralelizuar situatën me ndërhyrjen e NATO-s në ish-Jugosllavi në vitin 1999 dhe me rrëzimin e regjimit të ish-liderit serb, Sllobodan Millosheviq.

“E gjithë kjo po realizohet siç ndodhi në Serbi. Gënjyen gjatë gjithë kohës se bëhej fjalë për katastrofë humanitare, ndërsa thelbi ishte në dy gjëra: e para, ndryshimi i regjimit në Beograd dhe, e dyta, thelbi i gjithë veprimit të NATO-s, sigurimi i pavarësisë së Kosovës. Pra, kjo është një përpjekje për të marrë pushtetin e plotë në Iran dhe për ta orientuar Iranin, siç do të thoshin ata, drejt vlerave perëndimore”, tha ai, transmeton albinfo.ch.

“Do ta ruaj paqen, por kjo varet edhe nga sa i fortë je. Ne do të sigurojmë sisteme jashtëzakonisht të fuqishme. Po e shqyrtojmë seriozisht këtë, kemi mbrojtje shumë-shtresore”, tha Vuçiq.