Presidentja Osmani nderon figurën e Skënderbeut

Mesazhi i Presidentës Osmani: Skënderbeu, simbol i përjetshëm i qëndresës

Presidentja e Republikës së Kosovës, Vjosa Osmani, ka kujtuar figurën e Heroit Kombëtar Gjergj Kastrioti–Skënderbeu, duke e cilësuar atë si simbol të lirisë, strateg të betejave dhe ndërtues të aleancave që mbrojtën jo vetëm tokën shqiptare, por edhe vlerat evropiane, përcjell albinfo.ch.

Përmes një mesazhi përkujtimor, Osmani ka theksuar se Skënderbeu ishte figura kyçe e qëndresës shqiptare dhe një mbrojtës i dinjitetit, besimit dhe lirisë së kontinentit evropian në një nga periudhat më të vështira historike.

“Gjergj Kastrioti–Skënderbeu ishte shpata e lirisë, strateg i betejave dhe ndërtues i aleancave. Ai nuk e mbrojti vetëm tokën shqiptare, por edhe dinjitetin, besimin dhe lirinë e kontinentit evropian. Nga Kruja në zemrën e Evropës, emri i tij u bë simbol i qëndresës, i nderit dhe i identitetit tonë të përjetshëm”, ka shkruar presidentja.

Ajo ka theksuar se trashëgimia e Skënderbeut vazhdon të frymëzojë brezat, duke e bërë atë një figurë qendrore të identitetit kombëtar shqiptar dhe një simbol të përhershëm të rezistencës dhe unitetit.

Në fund të mesazhit, Osmani ka nderuar heroin kombëtar me fjalët: “Lavdi Kryetrimit Gjergj Kastrioti–Skënderbeu!”.

---