Presidentja Osmani pret sot në takim emisarët Escobar dhe Lajçak

Sot, presidentja e Kosovës, Vjosa Osmani, do të presë në takim Përfaqësuesin Special të BE-së për Dialog, Miroslav Lajçak, si dhe të dërguarin e posaçëm për Ballkanin Perëndimor të SHBA-së, Gabriel Escobar, përcjell albinfo.ch.

Referuar njoftimit nga Presidenca, takimi nis në orën 14:00.

Vlen të theksohet se Osmani ka pasur takim të ndarë me Escobar edhe gjatë ditës së djeshme. Pas takimit, nuk kishte deklarime për media, por presidentja e vendit, përmes një postimi në Twitter, dha pak detaje se çka është diskutuar.

Osmani tha se në këtë takim ka potencuar se Kosova do të vazhdojë të jetë palë konstruktive, e barabartë dhe e përkushtuar në procesin e dialogut, duke kontribuar për paqe dhe stabilitet në vend dhe rajon.

“Në takim me të dërguarin e posaçëm të Shteteve të Bashkuara për Ballkanin Perëndimor, Gabriel Escobar, potencova se Kosova do të vazhdojë të jetë palë konstruktive, e barabartë dhe e përkushtuar në procesin e dialogut, duke kontribuar për paqe dhe stabilitet në vend dhe rajon. Institucionet tona janë në komunikim dhe koordinim të vazhdueshëm me partnerët tanë ndërkombëtarë dhe çdo vendim yni reflekton frymën kushtetuese të vendit tonë dhe vlerat tona demokratike. Partnetiteti ynë me SHBA-në vazhdon të jetë qenësor”, ka shkruar Osmani.

Pos Osmanit, Escobar dhe Lajçak do të takohen sot edhe me liderët e opozitës në objektin e BE-së.

Gazeta Online Reporteri.net merr vesh se në këtë takim pritet të marrë pjesë edhe Ambasadori i ShBA-së në Kosovë, Jeffrey Hovenier.

Liderët opozitarë mbrëmë morën pjesë edhe në një darkë pune të thirrur nga i dërguari i posaçëm të Shteteve të Bashkuara të Amerikës për Ballkanin Perëndimor, Gabriel Escobar, darkë që u shtrua në rezidencën e Ambasadorit të ShBA-së në Kosovë, Jeffrey Hovenier.

Asnjëra palë ende nuk janë deklaruar rreth takimit.

Dy emisarët e BE-së dhe SHBA-së po qëndrojnë në rajon në përpjekje për të arritur një marrëveshje për targat dhe dokumentet e udhëtimit. Pas Prishtinës, të enjten, ata do të priten në Beograd.