Prishtina pritet të mbetet pa transport publik nesër, akuza e kundërakuza

Trafiku Urban Prishtine, FB

Kryeqyteti i Kosovës do të përballet nesër me ndërprerjen e plotë të transportit publik, pasi Ndërmarrja Publike Komunale “Trafiku Urban” ka paralajmëruar se do të ndalojë qarkullimin e të gjitha linjave të autobusëve.

Arsyeja e dhënë nga ndërmarrja është mungesa e fondeve për paga dhe karburant, për shkak të mos-ekzekutimit të buxhetit të komunës.

Sipas Trafikut Urban, vendimi i ndërprerjes është i përkohshëm dhe rifillimi i qarkullimit do të ndodhë sapo të ekzekutohen pagesat e nevojshme.

Kryetari i Prishtinës, Përparim Rama, deklaroi në një konferencë për media se ndërprerja e transportit është pasojë e, siç tha ai, bllokimit të hyrave vetanake të kryeqytetit nga Qeveria. Ai paralajmëroi se linjat e transportit publik “ndalet nga nesër” nëse buxheti nuk zhbllokohet menjëherë dhe se kjo mund të ndikojë edhe në shërbime të tjera komunale.

Ministri në detyrë i Financave, Hekuran Murati, reagoi përmes një postimi në Facebook, duke mohuar pretendimet e Ramës. Ai shkroi:

“Të premten pasdite, Thesari e ka alokuar buxhetin e dhjetorit për Komunën e Prishtinës, para kohe, me idenë që të paguheshin disa fatura për shërbime esenciale, siç ishte energjia elektrike.

Mirëpo në fund të ditës, stafi i Komunës së Prishtinës kishin përfunduar orarin dhe nuk e kishin kryer asnjë pagesë, me arsyetimin se ‘i kryejmë të hënën’.

Në vend se të paguanin faturat gjatë orarit të punës, Përparim Rama me nënkryetarët e tij kishin vendosur të bëjnë propagandë anti-qeveri gjatë fundjavës, duke u ankuar për gjoja bllokadën.”

Murati shtoi se kjo sjellje sqaron edhe arsyen pse deputetët e LDK-së, përfshirë Lumir Abdixhikun, nuk votuan buxhetin për Prishtinën në Kuvend, duke e lënë qytetin pa fonde për shërbime të nevojshme.