Pritet ekstradimi i të dyshuarit për vrasjen e Viganit

Kurdi me prejardhje nga Iraku, 21-vjeçari Shivan Mohammed, i dyshuar për vrasjen e Vigan Morinës, të kryer më 15 korrik, do të ekstradohet së shpejti nga Norvegjia në Zvicër. Kjo do të mund të ndodhë brenda dy javëve të ardhshme, shkruajnë mediet zvicerane.

Avokati i Shivan ka deklaruar për mediet e këtushme se kërkesa për ekstradim tashmë ka ardhur. Ai ka shtuar se klienti i tij nuk do të ushtrojë ankesë kundër ekstradimit në Zvicër.

Shivan është kapur në një qytet të Norvegjisë jugore, dy javë pas vrasjes së kryer në Cyrih. Siç është shkruar gjerësisht në mediet e ndryshme dhe në albinfo.ch, Shivan, ditën pas vrasjes, ka udhëtuar për në Norvegji, ku është gjetur dhe është arrestuar dy javë më vonë.

Rrjedha e saktë e krimit të bërë mëngjesin e hershëm të 15 korrikut ende mbetet e paqartë. Por, ajo që dihet është se pas një zënke të zhvilluar në lokalin e njohur të argëtimit Kaufleute, vëllezërit Morina dhe i dyshuari i mëvonshëm për vrasje janë nxjerrë jashtë lokalit. Vetëm pak më vonë ka ndodhur vrasja me thikë e Viganit dhe plagosja e rëndë e vëllait të tij, Visar Morinës.