Pritje deri në 90 minuta në Dheu i Bardhë, rritet fluksi në pikat kufitare të Kosovës

Kolona deri në 1.2 kilometra në hyrje të Dheu i Bardhë, ndërsa në pikat e tjera qarkullimi zhvillohet me pritje më të shkurtra.

Rritja e fluksit të udhëtarëve në kulmin e sezonit veror ka sjellë pritje më të gjata në disa pika kufitare të Kosovës, ndërsa ngarkesa më e madhe vazhdon të regjistrohet në pikën kufitare Dheu i Bardhë, transmeton albinfo.ch.

Sipas të dhënave të fundit të Qendrës Kombëtare për Menaxhim Kufitar, në Dheu i Bardhë pritjet për automjete në hyrje zgjasin deri në 90 minuta, ndërsa kolona ka arritur rreth 1.2 kilometra. Në dalje nga kjo pikë kufitare, pritja është rreth 35 minuta, me kolonë prej afërsisht 550 metrash.

Ngarkesë e shtuar është regjistruar edhe në pikën kufitare Hani i Elezit, ku pritjet janë rreth 10 minuta në të dy drejtimet, ndërsa kolonat arrijnë deri në 100 metra.

Në Muçibabë, udhëtarët presin rreth 5 minuta në hyrje dhe deri në 30 minuta në dalje, ku është krijuar kolonë prej rreth 150 metrash.

Në pjesën më të madhe të pikave të tjera kufitare, qarkullimi po zhvillohet normalisht, me pritje që variojnë nga 3 deri në 10 minuta dhe pa kolona të konsiderueshme.

Autoritetet u bëjnë thirrje qytetarëve që, para nisjes së udhëtimit, të informohen për gjendjen në pikat kufitare dhe, nëse është e mundur, të shfrytëzojnë vendkalime alternative për të shmangur pritjet e gjata. /Albinfo.ch

---