Prokuroria Speciale: Vazhdojnë hetimet për krimet e luftës në Zubin Potok, gjenden mbetje mortore në Jabukë

Tre persona janë arrestuar deri më tani, ndërsa mbetjet e gjetura do t'u nënshtrohen ekzaminimeve mjeko ligjore dhe analizave të ADN-së.

Prokuroria Speciale e Republikës së Kosovës ka bërë të ditur se, në koordinim me Policinë e Kosovës, po vazhdojnë intensivisht hetimet lidhur me rastin e dyshuar të krimeve të luftës në komunën e Zubin Potokut, përcjell albinfo.ch.

Sipas njoftimit, deri më tani janë arrestuar tre persona, të dyshuar për veprën penale “Krime lufte kundër popullsisë civile”.

Gjatë veprimeve hetimore janë kontrolluar disa lokacione. Në fshatin Jabukë janë gjetur mbetje mortore, të cilat do t’u nënshtrohen ekzaminimeve mjeko ligjore dhe analizave të ADN-së me qëllim identifikimin e tyre.

Ndërkohë, gërmimet në fshatin Kalludër e Vogël po vazhdojnë, ndërsa autoritetet kanë nisur hetime edhe në një lokacion të tretë.

https://www.facebook.com/share/p/19NkVi9Qxy/

Prokuroria njofton se prokurorja përgjegjëse, së bashku me hetuesit e Drejtorisë për Hetimin e Krimeve të Luftës dhe ekspertët forenzikë, ka qenë në vendngjarje për të mbikëqyrur zhvillimin e veprimeve hetimore.

Për shkak të fazës së ndjeshme të hetimeve, Prokuroria Speciale thekson se nuk mund të japë më shumë detaje në këtë fazë. Sipas njoftimit, informacione shtesë do të bëhen publike sapo kjo të jetë e mundur pa cenuar procesin hetimor.

---