Promovohet “Sy më sy me veprën, vështrime mbi veprën e Mehmet Kajtazit”

Më 25 shtator 2018, në Fakultetin e Edukimit në praninë e mbi 300 personaliteteve nga jeta publike dhe letrare, u promovua libri “Sy më sy me veprën, vështrime mbi veprën e Mehmet Kajtazit”.

Botimi i këtij libri është bërë nga Prof. Dr. Begzad Baliut që edhe para 5 vitesh ishte poashtu bartës i botimit të librit “Sy më sy me jetën, biografi e Mehmet Kajtazit”.

Prof. Dr. Begzad Baliu në kumtesën e tij bëri një pasqyrim shkencor dhe letrar të veprës së Mehmet Kajtazit.

Prof Baliu theksoi, në mes tjerash, se “kjo përmbledhje është vetëm një homazh i radhës për përvjetorin e ndërrimit jetë të tij, i cili do të vijojë sigurisht edhe me vëllimet e tjera, në përvjetorët  e rëndësishëm të lindjes, më parë sesa ata të vdekjes së tij”.

Ky libër i Mehmet Kajtazit ka thyer të gjitha rekordet me 561 repriza duke qëndruar që 26 vite në skenë nga Teatri Kombëtar i Kosovës.

Një paraqitje sa simbolike aq edhe e thellë ishte kur manifestimin e hapi Marena Kajtazi mbesa e Mehmet Kajtazit që lexoi poezinë “Gjyshi im Meti” nga libri i saj “Një planet me poezi”.

Marena, 11 vjeqare, befasoi të gjithë publikun me paraqitjen e saj që sikur kristalizonte trashëgiminë letrare të Mehmet Kajtazit.

Dr Lindita Kajtazi, vajza e Mehmet Kajtazit, falënderoi pjesëmarrësit në emër të familjes.

Lindita Kajtazi falënderoi 32 autorët e vështrimeve në këtë libër si edhe personat që kanë ardhur enkas nga Zvicra për këtë manifestim në mesin e tyre Dr Gëzim Dushin, Z. Arsim Ferizin dhe Z. Besim Rexhaj.

Ky libër përfshin Recensione, Vështrime, Intervista, Vështrime për dramat e inskenuara sipas veprave të Mehmet Kajtazit si dhe Tregime dhe Poezi për Mehmet Kajtazin nga 32 letrarë e gazetarë të spikatur.