Provokim i rëndë antisemitist në Gjenevë

"Kjo është thirrje për t`i vrarë hebrenjtë” ka thënë Johanne Gurfinkel nga Qendra Koordinuese kundër antisemitizmit

Një grup fashistësh nga Gjeneva me emrin “Geneve non conforme” (GNC) ka shpërndarë një fletëpalosje në të cilën shihet një burrë-kukull, i shtrirë në shpinë, me kapelën e hebrenjve në kokë dhe me flamurin izraelit mbi trup. Në ballë ka të ngulur një shigjetë nga harku i tipit të Vilhelm Telit.

Mbi gjithë këtë, mund të lexohet slogani: “Shpëtoje Zvicrën. Qëllo në cak!”. Grupi i përmendur, me këtë fletëpalosje thërret për një ndejë me grill që do të mbahet më 1 gusht, duke provokuar kështu rëndë hebrenjtë dhe Izraelin.

GNC është e njohur edhe për provokime të tjera kundër politikës së Izraelit.  Ky grupim ka dalë si rezultat i lëvizjes së shuar të djathtë Unité Populaire.

Vetëm një javë ka kaluar nga thirrjet për bojkotim të produkteve izraelite në Zvicër.

Organizatat e hebrenjve në Zvicër janë shprehur të tronditur nga fletëpalosja. “Kjo është thirrje për t`i vrarë hebrenjtë” ka thënë Johanne Gurfinkel nga Qendra Koordinuese e Zvicrës perëndimore kundër antisemitizmit (CICAD).

E përballur me kritika, GNC e ka zbutur përmbajtjen e fletëpalosjes së saj. Ata thonë se nuk thërrasin kundër hebrenjve. Kukulla në fletëpalosje është personifikim i shtetit të Izraelit, shkatërrimin e të cilit e kërkon GNC.

Por për kryetaren e një asocialioni izraelit në Zvicër, kjo është vetëm një farsë. “Shigjeta në ballë nuk lë fare vend për dyshim”, ka thënë ajo.