PSD: Kuvendi ta marrë rolin udhëheqës në dialog

Drejtuesit e Partisë Socialdemokrate janë shprehur edhe një herë kundër që presidenti i Kosovës, Hashim Thaçi, t’i prijë procesit të dialogut me Serbinë në Bruksel.

Nënkryetari i PSD-së, Visar Ymeri, ka kërkuar që rolin udhëheqës në dialog ta marrë Kuvendi i Kosovës, pasi, sipas tij, ai është i vetmi organ që ka legjitimitet për një gjë të tillë. Ymeri tha se është e domosdoshme që Kuvendi të marrë rol udhëheqës në këtë proces.

“Kjo nënkupton që Kuvendi duhet të jetë i përfshirë që nga fillimi e deri në fund. Legjitimiteti fitohet vetëm nëse Kuvendi është i përfshirë në këtë proces përgjatë gjithë dialogut. Strategjia, platforma duhet të miratohen në Kuvendin e Kosovës. Ne si parti konsiderojmë se kjo platformë duhet të shërbejë si parim bazë dhe udhërrëfyes në këtë proces”, ka thënë ai, përcjell albinfo.ch.

Ndërsa, Dukagjin Gorani ka thënë se duhet të ekzistojë një mekanizëm mbikëqyrës për procesin e dialogu. “Nuk ka dyshim që Thaçi aspiron të jetë udhëheqës i dialogut, por PSD-ja mendon se ai nuk ka legjitimitet, pasi Kuvendi i Kosovës është i vetmi organ që ka legjitimitet për një gjë të tillë”, tha Gorani.