PSHDK mohon legjitimitetin e degës së pretenduar në Vjenë

Kryesia Qendrore e Partisë Shqiptare Demokristiane të Kosovës (PSHDK) ka bërë të ditur se një dokument i publikuar nën emrin “Procesverbal nga takimi i pestë i degës së PSHDK-së në Vjenë”, i datës 7 dhjetor 2025, nuk është i njohur nga organet e partisë dhe nuk përfaqëson asnjë strukturë zyrtare të saj, transmeton albinfo.ch.

PSHDK njofton se dega në Vjenë nuk është themeluar apo miratuar nga organet kompetente dhe konsiderohet një strukturë e vetëshpallur, pa mandat politik apo statutor. Partia thekson se çdo aktivitet, deklaratë apo qëndrim i paraqitur në emër të PSHDK-së nga individë ose grupe të paautorizuara është i pavlefshëm dhe nuk ka mbështetje institucionale.

Kryesia e PSHDK-së rithekson përkushtimin ndaj funksionimit demokratik të partisë dhe vendimmarrjes përmes organeve zyrtare. Çështjet politike, përfshirë koalicionet dhe orientimet programore, trajtohen vetëm nga strukturat e njohura dhe të miratuara të partisë.

Partia bën thirrje për kujdes ndaj dezinformatave dhe thekson se nuk mban përgjegjësi për veprimet e strukturave apo individëve të vetëshpallur.