Publikohen rezultatet e para të Exit Poll-it: VV kryeson me 42.3%

Menjëherë pas mbylljes së vendvotimeve janë publikuar rezultatet e para të Exit Poll-it të realizuar nga kompania PIPOS dhe të transmetuar në Klan Kosova, të cilat e rendisin Lëvizjen Vetëvendosje si forcën e parë politike në vend me 42.3 për qind të votave.

Sipas të dhënave të Exit Poll-it, Partia Demokratike e Kosovës renditet e dyta me 21.6 për qind, ndërsa Lidhja Demokratike e Kosovës e treta me 17.3 për qind.

Aleanca për Ardhmërinë e Kosovës ka marrë 6.8 për qind të votave, ndërsa subjektet e tjera politike së bashku janë vlerësuar me 0.9 për qind.

Rezultatet e publikuara nga Klan Kosova, të bazuara në Exit Poll-in e realizuar nga PIPOS, ofrojnë pasqyrën e parë të orientimit të votuesve pas përfundimit të procesit të votimit. Megjithatë, këto rezultate nuk janë zyrtare dhe mund të dallojnë nga rezultati përfundimtar që do të publikohet pas numërimit të votave nga institucionet përgjegjëse.

Rezultatet e Exit Poll-it të PIPOS, të publikuara në Klan Kosova:

VV – 42.3%

PDK – 21.6%

LDK – 17.3%

AAK – 6.8%

Të tjera – 0.9%