Qeveria e Kosovës tregon nëse do të vendosë masa të reja anti-Covid

Keystone (AP Photo/Visar Kryeziu)

Nga Qeveria e Kosovës janë deklaruar në lidhje me atë se çfarë masash do të merret për parandalimin e pandemisë Covid-19, duke pasur parasysh rritjen e rasteve të reja, shkruan Insajderi, përcjell Albinfo.ch.

Zëdhënësi i Qeverisë, Përparim Kryeziu nuk ka përjashtuar marrjen e masave, por ka deklaruar se do të shikohet që masat kufizuese të kenë edhe natyrë mbështetëse.

I pyetur nëse do të ketë mbyllje për shkak të rritjes së numrit të rasteve pozitive me koronavirus, Kryeziu ka deklaruar se duhet të studiohet situata.

“Ka nevojë për një studim të mirëfilltë të situatës. Ajo i mbetet së pari Ministrisë së Shëndetësisë e së dyti bashkëpunimit që ka me institucioneve këshillëdhënëse e ekspertëve shëndetësorë të propozojnë masat, kjo pastaj vije në Qeveri dhe konsultohet me Kryeministrin dhe me ministrat. Që të sigurohet që secila masë që ka natyrë kufizuese, të ketë edhe natyrë mbështetëse”, ka deklaruar Kryeziu në Kanal10.

Theksojmë se të dielën ka arritur në Kosovë kontingjenti i parë i vaksinave anti-Covid. 24 mijë dozat e ardhura do t’u shpërndahen personelit mjekësor dhe të moshuarve të moshës mbi 80-vjeçare.

Numri i rasteve të reja në Kosovë ka shënuar rritje në ditët e fundit.