Qeveria e Zvicrës mbështet Olimpiadën Dimërore 2022

“Duhet t`i dëshmojmë botës se edhe një vend i vogël mund të organizojë një aktivitet të madh”, ka thënë ministri Maurer

Zvicra kandidon për Lojërat Olimpike Dimërore të vitit 2022. Në kuadrin e fushatës sensibilizuese për këtë organizim të madh, ministri Maurer, përgjegjës edhe për sport ka mbajtur të mërkurën në Bernë një konferencë për medie. Me këtë rast ai e ka vlerësuar olimpiadën si shans të madh për Zvicrën.

“Duhet t`i dëshmojmë botës se edhe një vend i vogël mund të organizojë një aktivitet të madh”, ka thënë Maurer. Ai ka shtuar se nuk bëhet fjalë për lojëra “gjiganteske”, në fakt “Zvicra ofron alternativë për gjigantizmin”.

Sipas ministrit, lojërat olimpike do të kishin efekt pozitiv edhe në raportet e brendshme në Zvicër, sepse disa gjëra do të vendosehin më shpejt se sa që bëhet kjo sot, ka thënë ai.

Këshilli Federal është shprehur i gatshëm për të mbështetur kandidaturën e Davosit dhe St.Morisit për të organizuar Lojërat Olimpike Dimërore të vitit 2022, duke i dhënë 30 milionë franga vetëm për aktivitetet promovuese të fillimit. Po kështu, këshilli ka garantuar se do të marrë përsipër mbulimin deri në 1 miliard franga të deficitit eventual që mund të prodhojnë lojërat olimpike.