Rekorde temperaturash në shumë qytete zvicerane, por jo në Ticino

Vala ekstreme e të nxehtit theu rekorde në pjesën më të madhe të Zvicrës, ndërsa kantoni jugor mbeti jashtë listës së rekordeve absolute

Vala e fortë e të nxehtit ka sjellë temperatura rekord në dhjetëra stacione meteorologjike në Zvicër, por Ticino ka qenë një nga përjashtimet. Sipas MeteoSwiss, rekorde të reja u regjistruan në 19 stacione matëse, përfshirë Cyrihun, Bazelin, Neuchâtelin dhe Delémontin, transmeton albinfo.ch.

Temperatura arriti në 39 gradë Celsius në Basel-Binningen dhe Beznau, duke vendosur një rekord të ri kombëtar për muajin qershor. Rekorde të reja u regjistruan gjithashtu në Neuchâtel (38.1°C), Delémont (38.2°C) dhe në disa stacione të Zyrihut, ndërsa temperatura më e lartë e regjistruar ndonjëherë në Zvicër, 41.5°C në Grono në vitin 2003, mbetet ende e pathyer.

Megjithëse në Ticino nuk u thyen rekorde absolute të temperaturës ditore, edhe ky kanton po përballet me kushte ekstreme. Në Lugano u regjistrua një natë tropikale, ku temperatura nuk zbriti nën 25 gradë Celsius, ndërsa autoritetet vazhdojnë të mbajnë në fuqi paralajmërimet për valën e të nxehtit.

Meteorologët paralajmërojnë se ndryshimet klimatike po rrisin intensitetin dhe shpeshtësinë e valëve të të nxehtit. Sipas tyre, temperaturat ekstreme që po përjeton Evropa po bëhen gjithnjë e më të zakonshme dhe në të ardhmen Zvicra mund të përballet edhe me temperatura deri në 45 gradë Celsius.

 

 

---