Rënie e interesimit për mësimin e gjuhës shqipe në Gjenevë, apel për prindërit

Komuniteti shqiptar në Gjenevë bën thirrje për regjistrimin e fëmijëve në kurset e gjuhës shqipe për ruajtjen e identitetit kulturor në diasporë.

Një rënie e dukshme e numrit të nxënësve në kurset e gjuhës shqipe në Gjenevë ka alarmuar komunitetin arsimor shqiptar. Përfaqësues të Lidhjes së Arsimtarëve dhe Prindërve Shqiptarë (LAPSH) nënvizojnë rëndësinë e angazhimit të vazhdueshëm për ruajtjen e gjuhës amtare dhe identitetit kulturor te brezat e rinj në diasporë, transmeton albinfo.ch.

“Qëllimi ynë është të rrisim ndërgjegjësimin te prindërit shqipfolës për rëndësinë e regjistrimit të fëmijëve në kurset e gjuhës shqipe dhe të inkurajojmë një përfshirje më të madhe në këtë proces arsimor,” shprehet Esana Liraj nga LAPSH Gjenevë. Ajo thekson se ruajtja e gjuhës amtare mbetet një element kyç për identitetin e brezave të rinj dhe kërkon angazhim të përbashkët nga i gjithë komuniteti.

Sipas Lirajt, rënia e numrit të nxënësve nënvizon nevojën për promovimin e vazhdueshëm të mësimit të gjuhës shqipe dhe mbështetjen e iniciativave arsimore në diasporë. Për këtë qëllim, LAPSH ka intensifikuar bashkëpunimet institucionale, përfshirë marrëveshjen e vitit 2025 me Shkollën Shqipe Zvicër, duke konsoliduar organizimin dhe zhvillimin e programeve mësimore.

Aktualisht, mësimi i gjuhës shqipe në Gjenevë ofrohet në 17 komuna, me orare të rregullta pasdite dhe në ditën e mërkurë. Organizatorët bëjnë thirrje që prindërit të regjistrojnë fëmijët dhe të kontribuojnë në ruajtjen e gjuhës dhe identitetit shqiptar në diasporë./Albinfo.ch

https://www.lapshgeneve.com/wp/

Për më shumë informacion dhe regjistrime: LAPSH Gjenevë

---