Restorantet e Lucernit lejohen të punojnë si mensa të ndërmarrjeve

Punonjësit nga degët përkatëse duhet të regjistrohen paraprakisht me shkrim në mensën e ndërmarrjes nga punëdhënësi i tyre

Në kantonin e Lucernit, restorantet mund të hapen si mensa të kompanive, në kushte të caktuara. Në to do të kenë qasje punëtorët nga sektorët e kopshtarisë, bujqësisë dhe pylltarisë, zejtarët, punëtorët e ndërtimit dhe të rrugëve, si dhe montuesit, raporton srf.ch.

Kancelaria e Shtetit, e Kantonit të Lucernit ka bërë të ditur se punonjësit nga degët përkatëse duhet të regjistrohen paraprakisht me shkrim në mensën e ndërmarrjes nga punëdhënësi i tyre, transmeton albinfo.ch. Orari i hapjes është i kufizuar gjatë ditëve të  punës, nga ora 11.00 paradite  deri në orën 14.00 pasdite.

Për më tepër, koncepti i mbrojtjes i mensave të ndërmarrjeve duhet të jetë në përputhje me të gjitha detyrimet ligjore. Kjo përfshin, veç tjerash, uljen e detyrueshme gjatë konsumimit, detyrimin e përgjithshëm për maskë gjatë hyrjes dhe daljes nga restoranti si dhe kur shkohet në pajisjet sanitare, përcjell albinfo.ch.

Restorantet përkatëse gjithashtu duhet të raportojnë në policinë e Lucernit deri në orën 10 për të ditur se për punëtorët e cilës ndërmarrje janë hapur.

---