Rezervat e gjakut kanë filluar të mbushen

Si rezultat i apeleve, qysh të martën sasia e gjakut të dhuruar ishte dy herë më e madhe se e zakonshmja

Pas alarmit që u bë gjatë uikendit të kaluar për mungesë rezervash të gjakut në spitalet zvicerane dhe apelit për të dhuruar gjak, radhë të gjata njerëzish ia mësyen qendrave të transfuzionit të gjakut.

Janë hapur edhe qendra ambulante të dhurimit të gjakut në vende që frekuentohen më shumë nga popullata, si në sheshe qytetesh, stacione trenash etj.

Si rezultat i apeleve, qysh të martën sasia e gjakut të dhuruar ishte dy herë më e madhe se e zakonshmja.

Mirëpo, drejtori i shërbimit të transfuzionit të gjakut në kuadrin e Kryqit të Kuq të Zvicrës, Rudolf Schwabe, ka thënë se megjithë këtë, emergjenca nuk ka kaluar. Ai shpreson se së paku nga fundi i javës sasia e rezervave të gjakut do të mbërrijë në një nivel të pranueshëm.

Schwabe kishte bërë alarmin të hënën, kur, sipas tij, në Kryqin e Kuq të Zvicrës “ishte ndezur e kuqja”. Kjo nënkuptonte që kishte rrezik të shtyheshin operacionet e zakonshme në mënyrë që të mbetej sasi e mjaftueshme gjaku për operacionet akute.