Rrëzimi i shkëmbinjve në Uri: A po ndikojnë temperaturat e larta në malet zvicerane?

Rreth 2 mijë metra kub shkëmb u shkëputën në Gross Ruchen, ndërsa ekspertët paralajmërojnë për rritje të rrëshqitjeve të vogla në zonat e larta alpine.

Rreth 2 mijë metra kub shkëmb janë shkëputur nga mali Gross Ruchen në kantonin Uri, duke krijuar një re të madhe pluhuri që u përhap deri në luginën e Reussit, raporton albinfo.ch. Në incident nuk pati të lënduar dhe as dëme në ndërtesa apo infrastrukturë, përcjell albinfo.ch.

Rënia e shkëmbinjve ndodhi në një lartësi prej rreth 2,900 metrash. Sipas ekspertëve, një nga shkaqet e mundshme lidhet me shkrirjen e akullit në nëntokë, i cili mund të ndikojë në qëndrueshmërinë e masiveve shkëmbore.

Studiuesi i permafrostit në Institutin Zviceran për Kërkime të Borës dhe Orteqeve (SLF), Robert Kenner, thotë se rrëzimet e vogla të shkëmbinjve dhe gurëve janë shtuar dukshëm me ngrohjen klimatike. Veçanërisht të prekura janë zonat alpine mbi 2,800–3,000 metra lartësi, të cilat përbëjnë rreth një për qind të territorit të Zvicrës. /Albinfo.ch

---