Rriten ndjeshëm kolonat në autostradat e Zvicrës

Kolonat në autostradat e Zvicrës arrijnë nivele rekord

Bllokimet e trafikut në autostradat e Zvicrës janë rritur ndjeshëm gjatë vitit 2025, sipas të dhënave të publikuara nga Zyra Federale e Rrugëve (ASTRA), përcjell albinfo.ch.

Gjatë vitit të kaluar janë regjistruar rreth 68 mijë orë kolona në rrugët kombëtare, duke konfirmuar përkeqësimin e situatës në rrjetin rrugor të vendit.

Ndër autostradat më të prekura janë A1, A2 dhe A3, ku trafiku i rënduar ka shkaktuar vonesa të shumta.

Veçanërisht problematike rezulton autostrada A2, në segmentin Basel–Chiasso, ku janë regjistruar 15.740 orë bllokime, ose rreth 31 për qind më shumë krahasuar me një vit më parë.

Edhe Gjeneva, e njohur prej kohësh për trafikun e dendur, vazhdon të jetë një nga pikat më problematike. Segmenti i autostradës ndërmjet aeroportit dhe Perly ishte ndër më të ngarkuarit, ndërsa vonesa të shumta u regjistruan edhe në disa pjesë të autostradës A9 në drejtim të Simplonit. /Albinfo.ch

---