Rritet importi i veturave elektrike në Kosovë, qytetarët kërkojnë heqjen e doganës

Importi i veturave elektrike në rritje, qytetarët kërkojnë heqjen e doganës

Importi i veturave elektrike në Kosovë po shënon rritje të vazhdueshme, megjithëse pjesëmarrja e tyre në treg mbetet e ulët. Sipas Doganës së Kosovës, gjatë vitit 2024 u importuan mbi 114 milionë euro vetura elektrike e hibride, ndërsa vetëm në periudhën janar–maj 2025 janë sjellë 1,539 vetura me vlerë mbi 56 milionë euro.

Aktualisht, veturat elektrike i nënshtrohen të gjitha taksave doganore – përfshirë doganën, akcizën dhe TVSH-në. Për veturat hibride, akciza është simbolike (10 euro), ndërsa për veturat elektrike varion sipas vitit të prodhimit e specifikave. Kjo, sipas importuesve, është arsyeja kryesore pse pjesëmarrja e tyre në treg arrin vetëm rreth 2% të totalit.

Pronari i AutoNet, Nexhdet Abazi, thekson se qeveria duhet të heqë taksat doganore dhe të subvencionojë blerjen e veturave elektrike, pasi kostoja aktuale është e lartë dhe mungon infrastruktura publike për karikim. “Nëse krahasohemi me vendet e rajonit, Kosova ka potencial për zhvillim, por pengesë mbeten politikat fiskale”, tha ai.

Edhe qytetarët ndajnë të njëjtin mendim, duke kërkuar heqjen e doganës dhe mbështetje nga shteti. Sipas tyre, veturat elektrike janë më ekonomike, nuk ndotin ambientin dhe përmirësojnë cilësinë e ajrit.

Ndërkohë, në rajon dhe botë, trendi i veturave elektrike është në rritje të shpejtë. Vetëm në vitin 2024 janë shitur mbi 17 milionë automjete elektrike, ndërsa në vitin 2025 kjo shifër pritet të kalojë 20 milionë, duke përbërë mbi 25% të tregut global. Kosova mbetet pas në këtë drejtim, por potenciali për zhvillim është i madh, sidomos me përdorimin e energjisë së rinovueshme.

---