Rritja e kostove çon në largimin e Wizz Air nga Aeroporti i Vjenës

Wizz Air mbyll operacionet në Vjenë, pas 8 vitesh

Kompania ajrore me kosto të ulët Wizz Air njoftoi largimin e plotë nga baza e saj në Vjenë, duke mbyllur operacionet deri në mars 2026. Ky vendim vjen pas rritjes së ndjeshme të tarifave aeroportuale, taksave dhe kostove të shërbimeve në Aeroportin e Vjenës, që e bëjnë të pamundur vazhdimin e modelit të biznesit me çmime ultra të ulëta, transmeton albinfo.at.

Tërheqja do të bëhet në dy faza: nga tetori 2025 do të ndërpriten fluturimet për në Bilbao dhe Londër (Gatwick), ndërsa mbyllja përfundimtare pritet më 15 mars 2026, me heqjen e tre avionëve të mbetur dhe ndërprerjen e të gjitha itinerareve.

Që nga hapja në 2018, Wizz Air ka operuar në Vjenë me pesë avionë Airbus A321neo, duke ofruar 28 linja në 20 vende. Pas mbylljes, pasagjerët do të kenë mundësi lidhjesh nëpërmjet Bratislavës dhe Budapestit, ndërsa kompania premton rimbursime dhe rirezervime pa pagesë për fluturimet e anuluara, shkruajnë mediat austriake.

Punonjësit e prekur do të përfitojnë mbështetje dhe oferta për punë në rrjetin tjetër të kompanisë. “Ky ishte një vendim i vështirë, por i nevojshëm për të ruajtur konkurrueshmërinë tonë afatgjatë,” tha Mauro Peneda, Drejtor Menaxhues i Wizz Air Malta. /Albinfo.ch

---