Rusia ndalon eksportin e energjisë elektrike drejt Finlandës

Finlanda deri më tani ka importuar rreth 10% të konsumit të saj total të energjisë elektrike nga fqinji i saj rus.

Eksportet e energjisë elektrike nga Rusia në Finlandë u ndërprenë gjatë orëve të para të mëngjesit të sotëm, pas një njoftimi nga një furnizues rus, tha një zyrtar nga operatori finlandez i rrjetit të energjisë elektrike.

Kompania përgjegjëse për shitjet ruse të energjisë elektrike në Finlandë, RAO Nordic, njoftoi të premten synimin e saj për të ndaluar dërgesat të shtunën, duke përmendur faturat e papaguara, ndërsa Finlanda përgatitet të shpallë kandidaturën e saj për NATO.

”Eksportet nga Rusia në Finlandë aktualisht janë në zero”, tha Timo Kaukonen, një menaxher operacionesh për ”Fingrid”, operatori i rrjetit.
Rrjeti është në ekuilibër falë importeve nga Suedia, sipas hartës në kohë reale të ”Fingrid”, i cili tha të premten se mund të bënte pa energji elektrike ruse “pa vështirësi”, raporton Afp, përcjell Albinfo.ch.

”RAO Nordic”, një degë me qendër në Helsinki e ndërmarrjes ruse ”InterRAO”, e justifikoi mbylljen të premten, duke thënë se nuk kishte marrë pagesë për energjinë elektrike të furnizuar në Finlandë që nga 6 maji.
Ky njoftim vjen në një sfond të tensioneve në rritje midis Moskës dhe Helsinkit, që ka shpallur dëshirën e tij për t’u bashkuar me NATO-n pa vonesë, nën ndikimin e ofensivës ruse në Ukrainë.
Shpallja e kandidaturës finlandeze pritet të dielën, gjatë një konference për shtyp nga presidenti Sauli Niinisto dhe kryeministrja Sanna Marin.

---