Serbia ndërmerr masa për ndeshjen me Shqipërinë

Federata Serbe e Futbollit (FSS) ka shpërndarë një njoftim për shtyp ku informon për masat e marra lidhur me ndeshjen Serbi-Shqipëri, që do të zhvillohet më 11 tetor në Leskovac.

“Biletat për këtë takim janë të personalizuara dhe nuk do të lejohet hyrja në stadium nëse emri në biletë nuk përputhet me dokumentin personal. FSS paralajmëron se në disa qytete të jugut të Serbisë ka pasur tentime për të blerë bileta në mënyrë të paligjshme, dhe çdo blerje e tillë do të jetë e pavlefshme, pasi nuk do të lejohet hyrja në stadium”, thekson federata.

Për shkak të masave të rrepta të sigurisë, të gjithë çakmakët, monedhat metalike dhe objektet e forta do të konfiskohen gjatë kontrollit në dy pika hyrjeje. FSS i bën thirrje tifozëve që të vijnë me kohë, në mënyrë që të marrin pjesë në ndeshje pa vonesa dhe në përputhje me rregullat. Siguria e lojtarëve, zyrtarëve, tifozëve dhe të gjithë pjesëmarrësve është prioritet absolut i Federatës dhe autoriteteve shtetërore.

Federata shton se nuk do të lejojë asnjë situatë që mund të rrezikojë zhvillimin normal të ndeshjes ose të shkaktojë dëme për ekipin kombëtar, federatën ose vendin.

“Të gjitha autoritetet e rendit do të veprojnë në mënyrë profesionale, të vendosur dhe pa vonesë ndaj çdo përpjekjeje për të shkaktuar incidente ose për të prishur rendin dhe qetësinë,” përfundon FSS.