Shakira akuzohet për evazion fiskal

Këngëtarja e famshme Shakira pritet të akuzohet për evazion fiskal brenda disa ditësh, pasi nuk ka paguar 14.5 milionë euro taksa.

E përditshmja “El Pais” raporton se pas një hetimi dyvjeçar të bërë nga autoritetet del se këngëtarja nuk ka shlyer detyrimet dhe do të përballet me akuzë.

Shakira, e cila ka dy fëmijë me futbollistin e Barcelonës, Gerard Pique, e kalon pjesën më të madhe të kohës së saj në Spanjë.

Sipas ligjit spanjoll, njerëzit që kalojnë më shumë se 183 ditë të vitit në Spanjë duhet t’i paguajnë shtetit spanjoll taksë mbi të ardhurat e tyre, edhe kur i fitojnë ato jashtë shtetit.

Shakira pretendon se jeton në Bahamas pikërisht për të shmangur detyrimet financiare ndaj shtetit spanjoll. Ajo këmbëngul se nuk i ka shkelur rregullat, duke thënë se ka ndjekur me rigorozitet udhëzimet e këshilltarëve të saj financiarë.