Shaqiri pas lëndimit, gati për të startuar

(KEYSTONE/Georgios Kefalas)

Xherdan Shaqiri, pas lëndimit muskulor që e pati javën e kaluar, do të startojë nesër në ndeshjen derbi ndaj Young Boys-it, përcjell albinfo.ch.

Ndeshja zhvillohet nesër nga ora 16:30 dhe është e rëndësishme për të dyja ekipet që po luftojnë për titull kampioni.

Vlen të theksohet se ky duel takon xhiros së 28-të të kampionatit elitar të Zvicrës.

Vikendin e kaluar, Baseli luajti 1:1 në udhëtim te Luzerni, ndërsa Shaqiri, shkaku i telasheve muskulore, luajti vetëm në pjesën e parë.

“Ai po ndihet mirë tani”, ka thënë trajneri Fabio Celestini në konferencën për shtyp të premten mbrëma.

Baseli ka shitur 26 mijë bileta për duelin ndaj Young Boys-it, që është kampion në fuqi i Zvicrës.

Shaqiri, 33-vjeçar, ka zhvilluar 26 ndeshje në të gjitha garat e edicionit aktual. Ka shënuar 11 gola dhe ka dhuruar 12 asistime.