Shkolla e muzikës “Prenk Jakova” shkëlqen me koncertin e saj në Vjenë

Për tri orë sa zgjati ky koncert, orkestra interpretojë vepra të ndryshme të muzikantëve të njohur botërorë dhe atyre shqiptarë

Në kuadër të projektit “Evropa na bashkon“, shkolla e muzikës “Prenk Jakova” më 09.05.20022, në ditën e festës së Evropës, mbajti koncert në sallën “MuTh” që është njëra nga sallat më të njohura të koncerteve në Vjenë.

Nën organizimin e violinistit austriak Johhans Fleischmann dhe dirigjentit gjakovar, Kastriot Sada, orkestra Kamertale me një ekip prej 22 muzikantëve profesionistë si dhe dy dirigjenteve, Kastriot Sada dhe Pëllumb Vula, performuan vepra të ndryshme të muzikantëve të njohur botërorë dhe atyre shqiptarë.

Për tri orë sa zgjati ky koncert, orkestra interpretoi vepra nga Wolfgang Amadeus Mozart, Rexho Mulliqi, Felix Mendelssohn, Bartholdy dhe Kujtim Laro. Pas çdo interpretimi të veprave, publiku austriak dhe shqiptar i mirëpriti me duartrokitje, veçanërisht pas tingujve të muzikës “Baresha”, vepër kjo e kompozuar nga Rexho Mulliqi.

Këtë projekt e mbështetën Kuvendi Komunal i Gjakovës, Ministria Federale e Republikës së Austrisë për Çështjet Evropiane dhe Ndërkombëtare si dhe Ambasada e Republikës së Kosovës në Austri, të cilët pas koncertit përmes një postimi në “Facebook”, ndër të tjera kanë thënë:

“Ky koncert është urë e re në mes të Kosovës dhe Austrisë nëpërmjet muzikës dhe vjen me iniciativë të violinistit të shquar, Johannes Fleischmann dhe muzikantëve të Gjakovës, me angazhim nga drejtorët e shkollës së muzikës Kastriot Sada e Pëllumb Vula”, thuhet në postimin e Ambasadës së Kosovës, përcjell albinfo.at.

Mysafirë të koncertit nga Kosova ishte ministrja e Arsimit dhe Shkencës e Kosovës, znj. Arbërie Nagavci dhe drejtoresha për Kulturë e Komunës së Gjakovës, znj. Adea Roka.

Në shenjë falënderimi për këtë shfaqje të shkëlqyeshme të orkestrës dhe emocioneve që dhuruan për publikun, afaristi i njohur shqiptar në Vjenë, z. Argëtim Hani shtroi një darkë për të gjithë anëtarët e orkestrës, në njërin nga restorantet më të njohura në qendër të Vjenës.

 

---