Shpallja e rezultateve përfundimtare të zgjedhjeve në Kosovë mund të bëhet më 26 qershor

Komisioni Qendror i Zgjedhjeve

Zëdhënësi i Komisionit Qendror të Zgjedhjeve në Kosovë, Valmir Elezi, ka njoftuar për procesin që do të zhvillohet gjatë ditëve në vazhdim, një ditë pas zgjedhjeve të parakohshme.

Ai ka njoftuar se nëse nuk ka ndonjë ankesë nga subjektet politike, është paraparë që shpallja e rezultateve përfundimtare të bëhet më 26 qershor, ndërsa certifikimi deri më datën 6 korrik.

Tutje, ai u shpreh se kjo varet nga edhe ecuria e aktiviteteve në qendrat e numërimit.

“Në planin e aktiviteteve të miratuara qysh në fillim të këtij procesi zgjedhor, në rast se nuk ka ankesa, shpallja e rezultateve përfundimtare planifikohet të bëhet deri më datën 26 qershor, pra ky është parashikim në Planin Operacional të Aktiviteteve të KQZ-së qysh në fillim, ndërsa certifikimi i rezultateve përfundimtare dhe përmbyllja e këtij procesi zgjedhor planifikohet të bëhet deri më datën 6 korrik. Këto janë vetëm planifikime sepse krejt kjo varet nga ecuria në këto qendra të numërimit”, ka thënë ai, transmeton albinfo.ch.

“Është përmbyllur numërimi i votave të subjekteve politike dhe pas përfundimit të procedurave të tjera materialet zgjedhore nga 949 qendra të votimit janë tërhequr dhe dërguar në 38 qendra komunale të numërimit. Sipas planifikimeve, verifikimi dhe numërimi paraditen e së hënës ka filluar në Qendrat Komunale të Numërimit të 15 komunave: Leposaviq, Novobërd, Obiliq, Shtime, Shtërpcë, Zubin-Potok, Zveçan, Junik, Mamushë, Hani i Elezit, Graqanicë, Ranillug, Partesh, Kllokot dhe Mitrovicë e Veriut, ndërsa pasdite aktiviteti do të fillojë në 23 komunat e tjera”, ka thënë ai.

Sipas ligjit për Zgjedhjet e Përgjithshme, numërimi bëhet në vendvotim pasi të bëhet procesi i votimit ndërsa numërimi i votave të kandidatëve për deputetë, bëhet në Qendrat Komunale të Numërimit.