Shqipëri: 90 përqind e të shtruarve në spital, të pavaksinuar

Drejtoresha e Spitalit Infektiv, Najada Çomo deklaroi sot se gati 90% e personave të shtruar në spital janë të pavaksinuar.

Në mbledhjen e Komitetit Teknik të Ekspertëve, Çomo theksoi se “gjatë periudhës së fundit numri i personave të shtruar në COVID 1 dhe 3 është në gjendje të qëndrueshme, rreth 140 pacientë, plus minus sipas ditëve të caktuara”.

“Në spital shtrohen format mbi të mesmen dhe rreth 70% e rasteve të shtuara në spital i takojnë janë forma të mesme të rënda, 20% janë forma kritike, është edhe një përqindje e vogël që në gjuhën mjekësore quhen forma të brishta nga ana epidemiologjike, që kanë arsye për të qëndruar në spital”, nënvizoi Çomo.

Sipas saj, grupmosha e shtruar në spital nga është nga 19 vjeç deri mbi 90 vjeç.

“Numri i të shtruarve në spital në grupmoshën e re është i rritur dhe 30% e të sëmurëve në spital i takojnë moshës 19-45 vjeç”, tha Çomo, transmeton atsh, përcjell Albinfo.ch.

Drejtoresha Çomo bëri të ditur se rastet e shtruara në spitale i takojnë qyteteve të mëdha si Tirana, Fieri, Berati, Durrësi, që kryesisht janë qytetarë që vijnë nga zonat urbane.

“Duke qenë se gati 30% janë mosha të reja vlerësohet fort procesi i vaksinimit të tyre dhe në moshat mbi 65 vjeç dhe 70 vjeçare që kanë bërë dy doza vaksinimi është e rëndësishme kryerja e dozës së tretë të vaksinës, pasi është një armë e fuqishme për mbrojtjen e shëndetit të njerëzve”, tha Çomo.