Shqipëri: Për dy muaj, 39 persona humbin jetën në aksidente rrugore

39 viktima, vetëm në dy muajt e fundit!

Trafiku rrugor çdo herë e më shumë po humb jetën e njerëzve. Pavarësisht ashpërsimit të ligjeve dhe gjobave, aksidentet e trafikut po shënojnë rritje.

Vetëm në dy muajt e fundit u shënuan 39 viktima, 14 më shumë se shtator-tetori i 2018-ës.

20 viktima vetëm në muajin shtator 2019.

Sipas statistikave të institucioneve, vetëm gjatë 9 muajve të parë të këtij viti, si pasojë e aksidenteve kanë humbur jetën 157 persona.

Sipas raporteve policore, vetëm mbrëmjen e djeshme, në autostradën Tiranë-Durrës ndodhën 3 aksidente me një të vdekur. Ndërkohë, sot policia njoftoi nisjen e një aksioni të ri kundër shkelësve të qarkullimit rrugor. Në aksion janë përdorur jo vetëm patrullat e policisë rrugore, por edhe agjentë civilë.

Po ashtu, shkaku kryesor i aksidenteve në Shqipëri vlerësohet shpejtësia dhe mosrespektimi i sinjalistikës rrugore dhe përdorimi i celularit në timon. Edhe pse ligjet për qarkullimin e mjeteve janë ashpërsuar, sërish niveli i viktimave dhe aksidenteve mbetet i lartë, në krahasim me vendet e tjera në rajon.

Sipas ekspertëve, problem nuk janë vetëm gabimet e drejtuesve të mjeteve, por edhe shkelja ose mosnjohja e rregullave të qarkullimit nga këmbësorët që presin rrugën jashtë vijave të bardha, përcjell albinfo.ch.

 

---