Shqipëri: Tre milionë euro të sekuestruara në 11 muaj, rritje në krahasim me një vit më parë

pixabay

Rreth 3 milionë euro janë sekuestruar nga Policia e Shqipërisë në 11 muajt e fundit, pasi nuk janë deklaruar në kufij, siç parashikon ligji, gjë që hedh hije dyshimi mbi origjinën e këtyre parave, të cilat kanë tentuar të futen ilegalisht në Shqipëri jashtë sistemit bankar, sipas TCH.

Pjesa më e madhe është kapur në valutë, ku dominon euro me gati 2 milionë, ndërsa krahasuar me një vit më parë është parë një rritje e konsiderueshme e vlerave monetare të sekuestruara për këtë vepër penale, përcjell albinfo.ch.

Gjatë këtij viti Policia e Tiranës ka evidentuar 83 raste të mosdeklarimit të vlerave monetare dhe sendeve me vlerë në kufij dhe numri më i lartë është shënuar në Tiranë, 33 raste të tilla.

Policia ka identifikuar si autorë të kësaj vepre penale 86 persona, nga të cilët 8 janë arrestuar dhe të tjerët janë proceduar në gjendje të lirë.

Të arrestuarit dhe të proceduarit janë 50% më shumë se një vit më parë, ku ka pasur 40 autorë, nga të cilët 36 janë proceduar penalisht dhe 4 janë arrestuar.

Ndryshe, pothuajse në të gjitha rastet në pranga përfundojnë vetëm drejtuesit e mjeteve, ku gjenden të fshehura paratë dhe hetimi nuk ka mundur dot të shkojë tek personat që kanë poseduar këto para dhe se në çfarë forme i kanë përfituar.