Shqipëria e Kosova, me konsullata të përbashkëta

Foto: Gent Cakaj (Fb)

Ministrat e Punëve të Jashtme të Shqipërisë dhe Kosovës, Gent Cakaj dhe Behgjet Pacolli, kanë nënshkruar marrëveshjen ndërministrore për bashkim të përfaqësive diplomatike e konsullore dhe për bashkëpunim strategjik në fushën e politikës së jashtme, përcjell albinfo.ch.

Ministri Cakaj deklaroi se marrëveshja ka katër shtylla kryesore: politike, diplomatike, profesionale dhe kulturore.

“Republika e Shqipërisë nga sot e tutje merr përsipër jo thjesht afirmimin deklarativ, por edhe përfaqësimin e drejtpërdrejtë, mbrojtjen konkrete dhe afirmimin pa kushte të qëndrimeve zyrtare të Republikës së Kosovës në të gjitha instancat ndërkombëtare, ku përfaqësimi i Kosovës për shkaqe objektive është i pamundur. Kemi vendosur edhe ngritjen e Këshillit të përbashkët për planifikim strategjik, i cili ngarkohet me detyrën e përcaktimit të prioriteteve strategjike dhe propozimin e rregullt të politikave të rëndësisë kombëtare. Kosova dhe Shqipëria tani e tutje nuk do të veprojnë si një trup i unifikuar, por edhe me një qasje aktive në botën e jashtme”, ka deklaruar Cakaj.

Ai shtoi se dy vendet nga sot e tutje fillojnë punën për të pasur ambasada dhe konsullata të përbashkëta anembanë botës.

Kurse ministri i Punëve të Jashtme i Kosovës, Behgjet Pacolli, deklaroi se operimi i dy vendeve si një trup i vetëm do të sjellë më shumë rezultate.

“Ka një mori vendesh ku ne operojmë si dy entitete dhe unë mendoj se kjo është e tepërt. Ne duhet që këto energji t’i bashkojmë dhe të veprojmë së bashku, që ne të kemi përfaqësi të përbashkëta”, ka thënë Pacolli.