Kombëtarja U21 e Shqipërisë do të përballet me Austrinë

Kombëtarja U21 vijon përgatitjet e saj për ndeshjen me Austrinë për kualifikueset e Evropianit 2021 të grupmoshës 21 vjeç.

Dy prej futbollistëve më të talentuar që janë në dispozicion të Alban Bushit, Giacomo Vrioni dhe Jrugen Celhaka, shprehën ambicien e tyre për të marrë 3 pikët në këtë ndeshje, njofton tch, përcjell albinfo.ch.

Giacomo Vrioni: Do të tentojmë të marrim 3 pikët, do të jetë e vështirë, por do të përpiqemi. Nuk na pëlqen barazimi, do të luajmë për të fituar këtë ndeshje. Pikat më të forta është grupi, të japim shpirtin në lojë dhe shpresojmë që t’ia dalim.

Jurgen Celhaka: Trajneri e ka studiuar kundërshtarin, ne do të zbatojmë udhëzimet e trajnerit. Do të shkojmë për të marrë fitoren, vetëm marrja e 3 pikëve është rezultati pozitiv. Grupi është i bashkuar, atmosfera është e mirë, shpresojmë që të arrijmë objektivat. Tani duhet të fitojmë ndeshjen e radhës dhe pastaj të mendojmë për Andorrën.

Ndërkaq Vrioni që është pjesë e skuadrës së të rinjve të Juventusit, foli edhe për mundësinë e kalimit në Kombëtaren A.

Giacomo Vrioni: Do të jap maksimumin tim në ndeshjet me U21 dhe kur të më thërrasë trajneri Reja, unë do të jem i gatshëm.

Sfida kualifikuese e Euro 2021 e 21 vjeçarëve të Austrisë dhe Shqipërisë do të luhet ditën e premte, më 4 shtator, në Keine Sorgen Arena, në të njëjtën ditë me  sfidën e Kombëtares A ndaj Bjellorusisë.