Shqipëria mes 10 destinacioneve që ia vlen të vizitohen në vitin 2026

Media amerikane “Quartz” veçon Rivierën Shqiptare, qytetet historike dhe Tiranën, duke e vlerësuar vendin edhe për kostot më të përballueshme.

Shqipëria është renditur nga media amerikane “Quartz” në mesin e 10 destinacioneve turistike të rekomanduara për t’u vizituar gjatë vitit 2026. Në fokus të artikullit është veçanërisht Riviera Shqiptare, e cila shtrihet përgjatë bregdetit nga Vlora drejt Sarandës, përcjell albinfo.ch.

Dhërmiu, Himara dhe Ksamili përmenden për plazhet, ujërat e kristalta dhe peizazhet ku malet ndërthuren me bregdetin. Sipas “Quartz”, Shqipëria ofron një përvojë mesdhetare, ndërsa në krahasim me disa destinacione të tjera të njohura të Adriatikut, mbetet një alternativë me kosto më të ulët.

Artikulli i kushton vëmendje edhe historisë së vendit, duke theksuar se izolimi i gjatë gjatë periudhës së regjimit komunist e la Shqipërinë jashtë zhvillimit masiv turistik që kishte përfshirë pjesë të tjera të Mesdheut. Kjo, sipas medias amerikane, ka ndikuar që vendi të ruajë një pjesë të veçantë të peizazhit dhe trashëgimisë së tij.

Përtej bregdetit, në artikull veçohen edhe Gjirokastra dhe Berati, të dyja pjesë e Trashëgimisë Botërore të UNESCO-s. Gjirokastra përmendet për arkitekturën tradicionale prej guri, pazarin dhe kalanë, ndërsa Berati për shtëpitë karakteristike dhe pamjen përgjatë lumit.

Në listë përfshihet edhe Tirana, e cila përshkruhet si një qytet që po ndryshon me shpejtësi dhe po zhvillohet si destinacion urban, me ndërthurje të arkitekturës, dizajnit dhe hapësirave të reja.

Një tjetër element i evidentuar nga “Quartz” është kostoja e udhëtimit. Ushqimi, akomodimi dhe makinat me qira në Shqipëri, sipas artikullit, përgjithësisht kushtojnë më pak se në disa prej destinacioneve më të njohura turistike të Adriatikut gjatë sezonit veror.

Rritja e lidhjeve ajrore me qytetet kryesore evropiane është një tjetër faktor që ka ndikuar në rritjen e qasjes së turistëve ndërkombëtarë në vend. Ndërkohë, zhvillimi i turizmit dhe investimet në infrastrukturë pritet të ndikojnë gradualisht edhe në nivelin e çmimeve.

Krahas Shqipërisë, lista e “Quartz” për vitin 2026 përfshin edhe Uzbekistanin, Butanin, Kosta Rikën, Japoninë, Slloveninë, Sri Lankën, Ishujt Faroe, Pulian në Itali dhe Armeninë./Albinfo.ch

---