“Shtyhet” 1 gushti për shkak të Ramazanit!

Në të vërtetë kremtimi i festës më të madhe nacionale të zviceranëve, 1 gushtit shtyhet për më vonë në disa shtete islamike

1 gushti, do të “shtyhet” për shkak të fillimit të muajit të Ramazanit!

Në fakt, vetë kalendari nuk ndryshon, 1 gushti mbetet aty ku është, pra menjëherë pas 31 korrikut, por ai që shtyhet është shënimi i 1 Gushtit, festës më të madhe nacionale e Zvicrës.

Bëhet fjalë për manifestimin e kësaj date në vendet islamike, përkatësisht në ambasadat dhe përfaqësitë tjera zvicerane në disa nga vendet e përmendura.

Zviceranët në shtetet si Siria, Tunizia ose Egjipti, vende të cilat për shkak të zhvillimeve politike ishin në fokus të interesimit të opinionit botëror, festën nacionale do ta festojnë në ditën e fundit të korrikut ose në shtator.

Kjo, për faktin se më 1 gusht fillon muaji i agjërimit, Ramazani.

Në ambasadat e Zvicrës në Siri dhe Tunizi, pritja për 1 gushtin është mbajtur më 28 korrik.

Zvicra nuk është vendi i vetëm që shtyn ose heq dorë nga shënimi i festës së saj nacionale në vendet e përmendura, ose e ndërron datën. Franca, për shembull, nuk e ka festuar ditën e saj nacionale, 14 korrikun në Tunizi.

Por fillimi i muajit të agjërimit nuk do të pengojë personelin e Ambasadës së Zvicrës në Egjipt për të festuar në “Klubin Zviceran”. Ndërsa festimi zyrtar i 1 gushtit në rezidencën e Ambasadorit të Zvicrës në Egjipt është shtyrë për në muajin shtator.