Skandali në Spanjë: U dhanë miliona euro për trena që nuk i zënë tunelet

Rasti rezultoi në dorëheqjen e nënsekretares së Transportit të Spanjës, Isabel Pardo de Vera.

Në Spanjë ka shpërthyer skandali, pasi u zbulua keqmenaxhimi i buxhetit për trena që nuk mund të kalojnë nëpër tunelet e rajoneve të Asturias dhe Cantabria, ku ata synonin të operonin.

Rasti rezultoi në dorëheqjen e nënsekretares së Transportit të Spanjës, Isabel Pardo de Vera, disa orë pas largimit të kreut të kompanisë shtetërore hekurudhore (Renfe), Isaiah Taboas, në një përpjekje për të qetësuar zërat në lidhje me skandalin e keqmenaxhimit që ka dëmtuar imazhin e qeverisë së Pedro Sanchez, transmeton abcnews, përcjell Albinfo.ch.

Qeveria spanjolle pohon se gabimi u zbulua herët për të shmangur humbjet financiare. Megjithatë, rajoni i Cantabria kërkoi kompensim.

Renfe i porositi trenat në vitin 2020, por vitin e ardhshëm prodhuesi CAF kuptoi se dimensionet që i ishin dhënë për trenat ishin të pasakta dhe e ndaloi ndërtimin.

Dy dorëheqjet u paraprinë nga shkarkimi i dy zyrtarëve të lartë muajin e kaluar, njëri në (Renfe) dhe tjetri në kompaninë shtetërore të infrastrukturës hekurudhore (Adif), por këto rezultuan të pamjaftueshme për të shuar zemërimin e qytetarëve spanjollë për planifikimin e dobët dhe vonesa pasuese.

Miguel Ángel Revilla, president rajonal i Cantabria, e përshkroi projektin si një “fiasko” ndërsa Adrian Barbon, president i Asturias, tha se ishte “i zemëruar dhe i zhgënjyer”.

“Që nga momenti kur mësova për këtë çështje, bëra gjithçka që munda për të gjetur se çfarë ndodhi dhe për të gjetur një zgjidhje”, tha ministrja e Transportit e Spanjës, Raquel Sanchez.

“Që në fillim kemi pranuar përgjegjësinë, kemi kërkuar falje, kemi pranuar gabimin dhe kemi vendosur përgjegjësinë. Kemi filluar edhe një auditim të brendshëm dhe kemi ngritur një grup pune për të gjetur një zgjidhje dhe për të përshpejtuar sa më shumë ndërtimin e trenave”, shtoi ai.

Qeveria, megjithatë, ka këmbëngulur deri më sot se gabimet u identifikuan përpara se të ndërtohej ndonjë tren dhe se asnjë euro e vetme e parave spanjolle nuk ka humbur si rezultat. Situata do të ishte më e keqe, shtoi ai, nëse do të ndërtoheshin trena më të vegjël që nuk përmbushnin pritjet e udhëtarëve.

Përpara zgjedhjeve rajonale dhe bashkiake në fund të majit dhe zgjedhjeve të përgjithshme përpara fundit të vitit, Partia Popullore (PP) konservatore e opozitës u përpoq të paraqiste trenat si dëshmi të mëtejshme të qasjes së dobët të qeverisë ndaj politikës./Albinfo.ch

---