Sommaruga: më shumë bashkëpunim me botën për çështjen e refugjatëve

Ministrja Sommaruga angazhohet për ndihmë azilkërkuesve në vendet e prejardhjes

Zvicra duhet të hyjë në bashkëpunim më të ngushtë me politikën ndërkombëtare të migracionit, ka deklaruar ministrja e drejtësisë e Zvicrës, Simonetta Sommaruga në një intervistë të botuar në gazetat në gjuhën frënge “24 Heures” dhe “Tribune de Geneve”.

Veç kësaj, ministrja ka thënë se bashkëpunimi me vendet e prejardhjes të refugjatëve nuk duhet të kufizohet vetëm në mbrojtjen e azilkërkuesve. “Ndihma për zhvillim në vendet prej nga ata vijnë është e lidhur me këtë. Nuk bën të harrohet dimensioni humanitar i problemit”, ka thënë ajo.

Ndaj ministres janë drejtuar kritika nga kantonet, sipas të cilave Zvicra me shumë vende të botës nuk ka marrëveshje për riatdhesim, dhe kjo po e vështirëson kthimin e refugjatëve. Sommaruga u është përgjigjur kritikave në fjalë se janë vetëm disa shtet si Egjipti, Iraku dhe Irani, me të cilat Zvicra nuk ka të nënshkruar marrëveshje të tillë.

Kishte edhe kritika se kantoneve të caktuara u janë ndarë shumë azilkërkues edhe pse në bazë të marrëveshjes së Dublinit ata duhet të kthehen në vendet ku janë paraqitur më parë (kryesisht Itali).

Kësaj kritike ministrja u është përgjigjur me të dhënën se nga fillimi i këtij viti nga vendet ku kanë paraqitur kërkesën e parë për azil janë gjashtë herë më shumë refugjatë që Zvicra i ka kthyer mbrapshtë se sa që janë kthyer në Zvicër.