Sot vazhdon numërimi i votave tjera të mbërritura me postë

Vijon numërimi i fletëvotimeve nga jashtë Kosovës

Komisioni Qendror i Zgjedhjeve (KQZ) ka njoftuar se gjatë ditës së sotme do të vazhdojë procesi i numërimit të pjesës së mbetur të fletëvotimeve nga votimi jashtë Kosovës, konkretisht ato të dërguara përmes postës, shkruan albinfo.ch.

Zëdhënësi i KQZ-së, Valmir Elezi, bëri të ditur se bëhet fjalë për fletëvotime të cilat janë tërhequr nga kutitë postare jashtë vendit më 2 dhe 5 janar 2026 dhe tashmë janë transportuar në Qendrën e Numërimit dhe Rezultateve (QNR).

Sipas të dhënave zyrtare, më 2 janar janë tërhequr gjithsej 8,180 pako me fletëvotime nga kutitë postare në qytete si Praga, Londra, Parisi, Zagrebi, Stokholmi, Stambolli, Nju Jorku, Kanberra dhe Kopenhaga.

Ndërkohë, më 5 janar janë tërhequr edhe 11,867 pako të tjera nga 13 kuti postare në qytete të ndryshme, përfshirë Tiranën, Berlinin, Vjenën, Bernën, Brukselin, Hagën, Podgoricën, Oslon, Shkupin, Otavën, Ljubljanën, Romën dhe Prishtinën.

Numërimi i këtyre fletëvotimeve po zhvillohet në ambientet e QNR-së dhe përfshin fazën e dytë të votave të ardhura përmes postës nga diaspora. KQZ ka theksuar se procesi do të vazhdojë gjatë gjithë ditës së sotme, deri në përfundimin e plotë të numërimit të këtyre pakove./Albinfo.ch

---