SP-PS, për “një Evropë më sociale”

Në kuvendin e saj të mbajtur sot, Partia Socialdemokrate e Zvicrës është marrë me politikën aktuale evropiane dhe qasjen që, sipas kësaj partie, duhet ta ketë Zvicra kundrejt saj.

Me këtë rast kryetari i SP-PS, Christian Levrat është deklaruar lidhur me krizën e euros. Ai ka shfaqur shpresën se, me fitoren e socialistit Hollande në garën presidenciale në Francë, gjërat mund të marrin të mbarën.

Levrat ka kritikuar tërthorazi ministrin e mbrojtjes Ueli Maurer nga partia SVP-UDC, për qëndrimin e tij kundër tendencave brenda politikës zvicerane për bashkim me BE-në. Kryetari i SP-së ka thënë se edhe pa një bashkim të tillë, Zvicra nuk mund të jetë e izoluar nga zhvillimet në BE.

Më tutje Levrat ka kritikuar qeveritë evropiane se ato tepër gjatë kanë ndihmuar bankat dhe gjatë kësaj kohe nuk janë kujdesur për punëtorët. “Tash, Evropa duhet të bëhet urgjentisht më sociale”.

Krahas temës së Evropës, delegatët kanë shqyrtuar edhe të drejtën e azilit. Me këtë rast ata kanë dënuar në mënyrë të vendosur ashpërsimet e Ligjit të azilit, që janë miratuar një javë më parë nga parlamenti.