Specializantët vullnetarë futen në sistemin e pagesës

Ministri i Shëndetësisë së Kosovës, Uran Ismaili, ka nënshkruar  plotësim-ndryshimin e Udhëzimit Administrativ për Shkollim Specialistik, me të cilin mundësohet që specializantët të futen në spacializim me pagesë, duke krijuar mundësi për shkollim specialistik dhe aftësim cilësor në fusha të ndryshme të kujdesit shëndetësor.

Ministri Ismaili tha se me nënshkrimin e këtij dokumenti rregullohet një e drejtë që u takon specializantëve si profesionistë shëndetësorë dhe sigurohet një trajtim i barabartë për kuadrot profesionale, përcjell albinfo.ch.

Më tej ministri Ismaili tha se Udhëzimi i ri Administrativ për Shkollim Specialistik legjitimon të drejtën e specializantëve për t’u paguar dhe se përmes plotësim-ndryshimit të tij është menduar edhe për gjeneratat e ardhshme.

“Reformat shëndetësore nuk bëhen pa u rregulluar të drejtat e profesionistëve shëndetësorë”, theksoi Ismaili. Ai tha se Kosova ka nevojë për kuadrot e saj dhe qëllimi i ministrisë është që t’i mbajë ata në vend, duke u siguruar kushte dhe mundësi për zhvillim profesional.