Specialja cakton seancë ndaj Thaçit më 28 nëntor, reagon OVL-UÇK

Keystone (AP Photo/Jerry Lampen via AP Photo, Pool)

Dhomat e Specializuara të Kosovës në Hagë e kanë caktuar 28 nëntorin, datë për mbajtjen e një konference përgatitore ndaj ish-presidentit, Hashim Thaçi.

OVL e UÇK-së ka shprehur indinjatën dhe zhgënjimin e thellë për faktin që një gjë e tillë është caktuar për këtë datë.

Përmes një reagimi në rrjetin social në Facebook kanë deklaruar se 28 nëntori është dita kur Gjergj Kastrioti – Skënderbeu ngriti flamurin në Krujë, duke shënuar ringritjen e shqiptarëve.

“Është dita e Pavarësisë së Shqipërisë, ditëlindja e komandantit tonë Adem Jashari, dhe data e daljes publike të Ushtrisë Çlirimtare të Kosovës. Për ne, kjo datë nuk është vetëm një simbol kombëtar, është një identitet i tërë, i mbështetur mbi gjak, sakrificë dhe krenari”, thuhet në postim, transmeton albinfo.ch.

Tutje në postim bëhet e ditur se për OVL-UÇK, mbajtja e një seance gjyqësore në këtë datë përbën fyerje të ndjenjave tona kombëtare dhe shpërfillje të realitetit historik të popullit të Kosovës.

“Kjo zgjedhje e panevojshme dhe e pakuptimtë vetëm sa e thellon bindjen se Dhomat e Specializuara vazhdojnë të tregojnë mungesë ndjeshmërie dhe një qasje të njëanshme ndaj historisë sonë çlirimtare dhe ndaj atyre që udhëhoqën luftën për liri”, thuhet ndër të tjera në postim.