Specialja: Katër të akuzuarit vepruan për një qëllim të përbashkët kriminal

Gjykata përmendi shënjestrimin e personave të konsideruar si pengesë për qëllimet e udhëheqjes së UÇK-së

Dhomat e Specializuara në Hagë kanë konstatuar se Hashim Thaçi, Kadri Veseli, Rexhep Selimi dhe Jakup Krasniqi, së bashku me persona të tjerë në udhëheqjen e UÇK-së, kishin një marrëveshje për një “qëllim të përbashkët kriminal”, raporton albinfo.ch.

Sipas kryetarit të trupit gjykues, katër të akuzuarit dhe persona të tjerë në udhëheqjen e UÇK-së kishin dy objektiva: pavarësinë e Kosovës dhe vendosjen e kontrollit politik dhe institucional mbi një Kosovë të pavarur.

Gjykata tha se këto objektiva synohej të realizoheshin përmes mjeteve ushtarake, politike dhe mjeteve të tjera. Trupi gjykues, sipas deklarimit të Smithit, nuk e konsideroi të nevojshme të përcaktonte nëse këto dy objektiva ishin në vetvete kriminale apo të paligjshme.

Në aktgjykim u tha gjithashtu se elemente kyçe të strategjisë së udhëheqjes së UÇK-së ishin “shënjestrimi, eliminimi dhe neutralizimi” i personave që konsideroheshin si pengesë për realizimin e këtyre qëllimeve. Në këtë kontekst, gjykata ka përmendur edhe anëtarë të LDK-së dhe FARK-ut./Albinfo.ch

---