Strasburgu shfajëson mohuesin turk të gjenocidit mbi armenët

Nacionalisti i majtë turk Dogu Perincek është shpallur i pafajshëm nga Gjykata për të Drejtat e Njeriut në Strasburg lidhur me mohimin që ai i ka bërë gjenocidit turk në Armeni. Ndërkohë që shumë historianë dhe politikanë e konsiderojnë vrasjen e qindra mijë armenëve gjatë Luftës së parë Botërore në Turqi, rast të gjenocidit, sipas Perincek-ut kjo është një “gënjeshtër ndërkombëtare”.

Këtë pohim ai e kishte bërë para dhjetë vitesh edhe në manifestime të ndryshme në Zvicër, për çfarë gjykatat zvicerane deri në instancën më të lartë (Gjykata Federale) e kishin dënuar për shkelke të ligjit kundër racizmit.

Pori Perincek e kishte shtyrë çështjen deri në Gjykatën Evropiane të të Drejtave të Njeriut në Strasburg. Në vitin 2013 dhoma e vogël e kësaj gjykate i kishte dhënë atij të drejtë, shkruan srf.ch. Sipas saj, Zvicra me dënimin e nacionalistit turk kishte bërë shkelje të lirisë së mendimit. Në një shoqëri demokratike duhet të debatohet edhe për Çështje të ndjeshme sikur kjo, thuhet në vendimin e atëhershëm të Gjykatës.

Ndërsa sot, edhe Dhoma e Madhe e Gjykatës Evropiane të të Drejtave të Njeriut i ka dhënë të drejtë Perincek-ut. Kjo për Zvicrën nënkupton rishikim të asaj se sa gjerësisht do të aplikojë ligjin mbi antiracizmin.