Mbi 600 mijë persona kanë mbetur pa energji elektrike në rajonin e Dnipropetrovskut, në lindje të Ukrainës, pas sulmeve të reja ruse ndaj infrastrukturës energjetike gjatë natës, përcjell albinfo.ch.
Kreu i administratës ushtarake rajonale, Oleksandr Hanzha, ka bërë të ditur se dëmtimet në rrjetin elektrik kanë detyruar spitalet të funksionojnë me gjeneratorë, ndërsa transporti publik elektrik në qytetin Dnipro është ndërprerë plotësisht.
Ekipet e kompanive energjetike po punojnë për rikthimin e furnizimit me energji elektrike, por ndërhyrjet po vështirësohen nga bombardimet e vazhdueshme.
Presidenti ukrainas, Volodymyr Zelensky, ka deklaruar se ndërprerje të mëdha të energjisë elektrike janë regjistruar në disa pjesë të vendit. Sipas tij, vetëm në rajonin e Zhitomirit, 140 ndërtesa banimi kanë mbetur pa ngrohje pas sulmeve ruse.
Forcat e armatosura ukrainase njoftuan se gjatë natës Rusia ka lëshuar tri raketa të tipit Kh-59/69 dhe 164 dronë sulmues, prej të cilëve 137 janë neutralizuar nga mbrojtja ajrore ukrainase.
Autoritetet ukrainase raportuan gjithashtu se një civil është vrarë dhe një tjetër është plagosur në Dnipro, ndërsa katër persona të tjerë kanë mbetur të plagosur në rajonin e Poltavës. /Albinfo.ch
