SVP: Imigracioni po shkakton bllokime trafiku në rrugët e Zvicrës

Partia Popullore Zvicerane pretendon se ardhja e rreth 100 mijë të huajve në vit po rrit ngarkesën në infrastrukturë dhe kostot për ekonominë

Partia e djathtë zvicerane Swiss People’s Party (SVP) ka intensifikuar fushatën e saj në mbështetje të iniciativës “Jo 10 milionëve”, duke argumentuar se rritja e imigracionit po ndikon drejtpërdrejt në mbingarkimin e rrugëve në Zvicër, përcjell albinfo.ch.

Sipas deputetes së SVP-së, Stefanie Heimgartner, rreth 100 mijë shtetas të huaj që vendosen çdo vit në Zvicër janë duke kontribuar në rritjen e bllokimeve në trafik, duke bërë që drejtuesit e automjeteve të kalojnë afro 55 mijë orë shtesë në kolonat rrugore çdo vit.

Ajo theksoi se kjo situatë nuk përbën vetëm një shqetësim për udhëtarët e përditshëm, por edhe një barrë të konsiderueshme për ekonominë e vendit.

“Sistemi po përballet me mbingarkesë, bllokime dhe kosto në rritje. Ata që lejojnë rritje të pakufizuar të popullsisë, pranojnë me vetëdije këto pasoja”, është shprehur Heimgartner.

Deklaratat vijnë në kuadër të debatit politik rreth iniciativës së SVP-së për kufizimin e rritjes së popullsisë në Zvicër, një temë që vazhdon të ngjallë diskutime të forta mes partive politike dhe opinionit publik./Albinfo.ch

---